धनगढीस्थित एसपिए कलेजमा वडादशैँ , दिपावली तथा छठपर्व लक्षित शुभकामना आदानप्रदान कार्यक्रम सम्पन्न भएको छ । एक महिना बढी लामो बिदामा विद्यार्थीहरु आ आफ्नो घर जाने भएकोले एकमुष्ट रुपमा सो कार्यक्रम राखिएको क्याम्पस प्रमुख योगराज उपाध्यायले बताए । कार्यक्रममा विद्यार्थीद्धारा विभिन्न भेषभूषा झल्किने नृत्य , गायन , गीत , गजल प्रस्तुत गरिएको थियो । यसैवीच युवाहरुको विदेश पलायनको विषय समेटिएको सन्देशमूलक नाटक समेत मञ्चन गरिएको थियो ।
कार्यक्रममा मन्तव्य राख्दै क्याम्पसका प्राध्यापक डा. देवेन्द्र प्रसाद भट्टले संघारमै आइपुगेको वडादशैँ तथा दिपावली हाम्रा ठूला धार्मिक र पौराणिक महत्वका चाडबाड रहेको र यस्ता कार्यक्रमले संस्कृति झल्काउने गरेको बताउनुभयो । यस्तै , सुदूर पश्चिमाञ्चल क्याम्पस विद्यार्थी परिषदका उपाध्यक्ष भुवन विष्टले लामो चाडपर्व बिदाको पूर्वसन्ध्यामा हरेक वर्ष यस्तो शुभकामना आदानप्रदान कार्यक्रम आयोजना गर्ने गरेको र आज पनि त्यसैको निरन्तरता भएको जानकारी दिए ।
उक्त कार्यक्रममा उल्लेख्य रुपमा क्याम्पसका विद्यार्थी , प्राध्यापक तथा कर्मचारीको सहभागिता रहेको थियो । क्याम्पसको प्रांगणमा सम्पन्न भएको उक्त कार्यक्रमको सञ्चालन पहिलो चरणमा निलम अधिकारी एवम् दीपक साउँद तथा दोस्रो चरणमा छत्रराज जोशी एवम् आशिका पोखरेलले गरेका थिए ।
